Maintenance électronique à Constantine

شكرا بزاف نشالله نبقاو عند حسن ظنكم، و نشكركم تاني على استقابلكم الطيب.

شكرا بالتوفيق ليكم.

السلام عليكم، شيء محزن لكن نرد طبعا باحترافية لأنو أول مرة في حياتي يدعي فيا زبون. الزبونة اتصلنا بيها الخامسة مساء قالت نحتاج كهربائي مستعجل قلتلها راني بعيد شوي قاتلي ارواح لانو لي مالف يخدم ماهوش هنا ... هزينا ادواتنا و رحنا ... المنزل عبارة عن طابق ارضي و طابق أول ... الطابق الأول مكانش فيه كهرباء تماما و هو سبب طلب الخدمة ... حين وصولنا كانت علبة الكهرباء الاساسية تاع الطابق كاملة منزوعة و الاسلاك مربوطة ببعضها بشريط لاصق ... كي سقسيت المرأة لي استقبلتني قاتلي أنا لي درت هكا ... علما أنو ألوان الاسلاك غير محترمة يعني عاودنا من الصفر باش عرفنا كل خيط وش خدمتو و أي غرفة يغذي و شكون الحيادي و شكون الفاز ... الخ عندي كل الصور لكن للأسف مانقدرش نحط صور في التعليقات كون راني حطيتهم. الطابق الأول كاامل كان يتغذى بخيط 2.5 مم مهزوز من علبة تفرع موجودة في مرحاض الطابق الارضي ... الخيطين تاع 2.5 مم في زوج ماشيين على برا في الهواء من دون اي تثبيت او عازل ... مع العلم أنو التوتر بين السلكين كان 190 في مكان 220 فولط .. هو شي لي خلانا نشكو في تسرب ولا خرب في هاد الاسلاك ... باش نتأكدو لازم نفصلوهم من تحت ...المهم هبطنا للعلبة هادي في الطابق الارضي فتحناها لقينا العلبة كاملة متعذية من مصباح المرحاض مع العلم أنو مصباح المرحاض فيه تلف داخل الحائط (بعد ما اختبرناه طبعا) و تبعنا المشكل حتى وصلنا لعبة تفرع معمرة بالمياه بسبب تسرب ماء في السقف الدومينوات مصديين ... خرجناهم كاامل و عاودناهم من الصفر مع اني اؤكد ان المنزل قديم و احترام معاير الكهرباء معدوم. المهم لقينا العطب ... و كان راح لحال قتلنا ارجعو غدا يعني ركبنا الاسلاك بطريقة وين المنزل مايباتش في الضلمة و كان هو الهدف ... ولباقي تفاهمنا نكملوه غدا و شرحت طرق التصليح الصحيحة ولا البسيطة و غير مكلفة و عرضتهم على المرأة لي كانت في المنزل ... و كان راح لحال في ليل 22:30 .. تفاهمنا نروحو و غدا نرجعو نشري المستلزمات و نعاود نركب الطابلو كامل تاع الطابق الاول و نحل المشكل تاع الطابق الارضي و نفصل الطابقين بأني نبدل الخيط القديم الخطير لي كانو مستعملينو و نهزو كابل جديد مباشرة من عداد الكهرباء و ندخلوه بطريقة الصحيحة ... الصباح اتصلت بالزبونة قلتلها السلعة تجي 4000 دج نشري قاتلي اشري طبعا ... رحنا خدمنا نهار كامل باه عاودت الطابلو بطريقة وين كي يجي كهربائي بعدي راح يفهم كلش بسهولة تامة ... ركبنا كابل 4مم من العداد و فوتناه في واجهة المنزل و ثقبنالو و دخلناه داخل المنزل الى الطابلو ... ركبنا الطابلو كامل و ركبنا علب التفرغ كاملين قفلناهم و حلينا جميع المشاكل الفرعية لي كانت ... كي وصلنا للمحاسبة .. المرأة لي كانت في المنزل قاتلي ماش انا لي عيطتلك ... لي عيطتلها الصباح كانت امرأة ثالثة حسب قولهم مافهمتش شكون ... و صاحبة التعليق ماشفتهاش ولا 10 ثواني باش تشوف خدمتي ولا تقيمني وش درت و وش مادرتش فقط هي صاحبة منشور بريكورام ... و في النهاية كي طلبت 16000 دج اجمال تاع عمل مستعجل في وقت ليل متؤخر زائد عمل يوم كامل ليوم لي بعدو ... 16000 دج منها 4000 دج سلعة ... و حنى للعلم زوج كهربائيين مع كااامل المعدات اللازمة و العمل احترافي و نظيف و ناس مربيين و أول مرة زبون يهدر علينا الهدرة هادي ... الخلاصة هادي كتبت التعليق ماتلاقيناهاش اصلا ... الناس لي حاضرين في المنزل ماعلقوش التعليق تاعها بتاتا ... ثانيا عاودت اتصلت بيها باش نرجع للدار نعطيها دراهمها و انا لي ندعي فيها لأنو الحمد لله شبعان و ماخصنيش دراهم من عند ناس يدعيو فيا. و خدمة زبائن بريكورام من فضلكم طورونا شوي الوضع مع الناس لي هك .. اتصلو بي نعطيكم كل الادلة و المكالمات و صوتيات واتساب تثبت وش كنت نقول ... سكرا